Minister Prof. Lalnilawma'n Ruantlang Water Supply Scheme (Solar Pumping) a hawng
PHED Minister Prof. Lalnilawma'n vawiin khan NABARD RIDF hnuaia sak Ruantlang Water Supply Scheme (Solar Pumping) a hawng a, Vanhnuailiana Hall, Ruantlanga a lawmna hunah khuallian a ni nghal bawk. He hunah hian Champhai South bialtu MLA Lt. Col. Clement Lalhmingthanga chu khual zahawm niin a tel bawk a ni.
Khuallian Prof. Lalnilawma chuan Ruantlang Water Supply Scheme hawn theih a ni ta hi lawmawm a tih thu a sawi a, Champhaia PHE hnuaia hnathawk te leh khawtlang hruaitute hnathawh hona tha tak avang a ni tih sawiin District hotute leh PHED pawh Ruantlang mipui lawm ang chiahin an lawm ve em em a ni tih a sawi a. Hnathawh nasa taka a kal hnuah vawiin hi an thleng thei tih sawiin a hmunhma leh a khawl te enkawlna kawngah Ruantlang mipuite an pawimawh a, hnathawh tawh te a thlawn loh nan uluk taka enkawl turin a chah a ni. Harsatna leh buaina erawh awm thei a ni a, a hmunah engineer leh hnathawk tha tak tak an awm a, anni hi rawn theih reng an ni tih a hrilh bawk. Ruantlang mipuiin he Water Supply Scheme hi tangkai taka an hman theih nan duhsakna hlanin a hawng a ni.
He hun hi PHED Chief Engineer Er. Lalropuia'n hun a kaihruai a, PHED Champhai WATSAN Division Executive Engineer Er. Jerome Lalremtluanga'n Water Supply Scheme chungchang technical report a pe a. Ruantlang VCP Pu Bethlehem Tlangchullova'n Ruantlang mipui aiawhin thu a sawi a, PHED Chief Engineer Er. K. Zohmingliana'n lawmthu sawiin hun a khar a ni.
Ruantlang Water Supply Scheme (Solar Pumping) hi NABARD RIDF XXIX hnuaia sak a ni a, cheng nuai sang hnih za hnih sawmkua panga (₹2295.88) sen niin he sum sena zaa sawmkua (90%) hi NABARD tum a ni. A chawm theih zat hi 70 lpcd a ni a, four stage pumping niin thla 21 chhungin zawh a ni.